BAKI, VOA, Orxan Qədirzadə

Türkiyə Prezidenti Rəcəb Tayyib Ərdoğan Ramazan bayramı münasibətilə xalqa video müraciətində ölkənin hava məkanının qorunması və milli təhlükəsizliyin möhkəmləndirilməsi istiqamətində atılan addımları diqqətə çatdırıb.

VOA xəbər verir ki, dövlət başçısı 86 milyon vətəndaşın təhlükəsizliyinə görə məsuliyyət daşıdıqlarını və bu məsələdə ehtiyatlı mövqe nümayiş etdirdiklərini vurğulayıb.

Prezident Ərdoğan Yaxın Şərqdəki vəziyyətə toxunaraq, İsrailin atəşkəsi pozması nəticəsində Qəzza, Şərqi Qüds və Cənubi Livanda mülki əhalinin bayramı hücumlar altında qarşıladığını bildirib. O, həmçinin 28 fevralda İsrailin İrana qarşı başlatdığı hücumların və Tehranın cavab zərbələrinin regionda gərginliyi daha da artırdığını qeyd edib.

Terrorla mübarizə sahəsində "Terrorsuz Türkiyə" təşəbbüsünün uğurlarından danışan Ərdoğan, Suriyanın şimalında əldə olunan konsensus sayəsində təhlükəsizlik narahatlıqlarının azaldığını və Suriyanın ərazi bütövlüyünün qorunduğunu deyib. İqtisadiyyat sahəsində isə Türkiyənin ötən il 3,6% artım nümayiş etdirdiyini və 2025-ci ilin yekunlarına görə İqtisadi Əməkdaşlıq və İnkişaf Təşkilatının (OECD) ən sürətlə böyüyən ilk üç ölkəsi sırasına daxil olduğunu xüsusi vurğulayıb.