Almaniya kansleri Fridrix Merts bəyan edib ki, Rusiya prezidenti Vladimir Putin və Ukrayna lideri Vladimir Zelenski arasında gözlənilən görüş baş tutmasa, Moskva əlavə sanksiyalarla üzləşə bilər. Merts bu açıqlamanı Kanadanın baş naziri Mark Karni ilə birgə keçirdiyi mətbuat konfransında verib.

Ukrayna Prezidenti Volodimir Zelenski sülh prosesi üçün liderlər səviyyəsində danışıqlara hazır olduğunu bildirib. Digər tərəfdən, Zelenski Rusiyaya qarşı sanksiyalar və tariflər daxil olmaqla bütün variantların masada olması lazım olduğunu vurğulayıb. Ukrayna Prezidenti Volodimir Zelenski sosial media hesabında paylaşdığı açıqlamada ABŞ-ın Prezidenti Donald Trampın Ukrayna və Rusiya üzrə xüsusi nümayəndəsi Keith Kellogg ilə görüşdüklərini bildirib. Zelenski Trampın sülhü təmin etmək mövzusundakı qətiyyətinə diqqət çəkərək“ABŞ-nin Ukraynanın təhlükəsizlik strukturlarında rol almağa hazır olmasını dəyərləndiririk. Komandalarımız da bu strukturu qurmaq üçün aktiv şəkildə işləyirlər.”- deyə qeyd edib. Zelenski, Rusiyanı danışıqlara məcbur etmək üçün sanksiyalar və tariflər daxil olmaqla bütün vasitələrin masada qalmalı olduğunu qeyd edərək bildirib ki, “Biz liderlər formatında görüşməyə hazırıq. Əsas məsələlərin həlli üçün bu format zəruridir. Artıq Moskvadan da eyni qətiyyət gözlənilir.” - deyə Zelenski qeyd edib.

Macarıstanın baş naziri Viktor Orban bildirib ki, Ukrayna prezidenti Volodimir Zelenski Budapeşti açıq şəkildə hədələyib və şantaj edib. Baş nazirin sözlərinə görə, Ukraynanın hədə və təzyiqlərlə Aİ-yə üzv olması mümkün deyil. O əlavə edib ki, Zelenskinin sözləri “nəticəsiz qalmayacaq”.

Rusiya Müdafiə Nazirliyi Ukrayna Silahlı Qüvvələrinin bu səhər Krıma pilotsuz uçuş aparatları (PUA) ilə hücum etdiyini bildirib. Səhər saatlarında hava hücumundan müdafiə qüvvələri yarımada üzərində ümumilikdə 8 dronu zərərsizləşdirib.

Avropa İttifaqına (Aİ) üzv ölkələrin müdafiə nazirləri Ukraynaya hərbi dəstəyin artırılması və Kiyevin müdafiə sənayesinin dəstəklənməsi məsələsini müzakirə edəcəklər. Nazirlər cümə axşamı axşam yeməyində bir araya gələcək, cümə günü isə hərbi dəstəyin genişləndirilməsi istiqamətində addımlar müzakirə olunacaq.

Rusiya Ukrayna münaqişəsinin həlli üzrə aparılan danışıqlarda çeviklik nümayiş etdirir, ABŞ isə prosesi vicdanla aparır. Bu sözləri ABŞ-ın vitse-prezidenti Cey Di Vens "NBC News" telekanalına müsahibəsində səsləndirib.

Kanada hökuməti Kiyevə silah tədarükü üçün 2 milyard Kanada dolları (təxminən 1,45 milyard ABŞ dolları) ayıracaq. Söhbət bu ilin iyununda keçirilən “Yeddilər qrupu” (G7) sammitinin yekunları üzrə açıqlanmış yardım paketindən gedir. Hökumətin planına görə, 835 milyon Kanada dolları (təxminən 603,6 milyon ABŞ dolları) zirehli texnika, tibbi avadanlıq, ehtiyat hissələri, atıcı silahlar, sursat, partlayıcı maddələr və pilotsuz uçuş aparatlarının (PUA) alınmasına yönəldiləcək. Daha 680 milyon Kanada dolları (491,5 milyon ABŞ dolları) isə NATO tərəfindən hazırlanmış Ukraynanın prioritet ehtiyacları siyahısına uyğun olaraq ABŞ istehsalı silahların alınmasına ayrılacaq.

Rusiya ilə Ukrayna arasında növbəti əsir mübadiləsi baş tutub. 146 rus hərbçisi Ukraynanın nəzarətində olan ərazilərdən geri qaytarılıb, əvəzində isə 146 Ukraynalı hərbçi təhvil verilib. Bununla yanaşı, Kursk vilayətinin səkkiz sakini də geri qaytarılıb.

Ukrayna Prezidenti Volodimir Zelenski sülhün təmin olunması məsələsində Rusiyaya güzəştə getmək istəmədiyini bildirib. O, Ukraynanın Müstəqillik Günü münasibətilə yayımladığı videomüraciətində qeyd edib ki, Ukrayna bir daha heç vaxt “kompromisə məcbur edilməyəcək”.

Ukrayna Prezidenti Volodimir Zelenski Türkiyə Prezidenti Rəcəb Tayyib Ərdoğana təşəkkür mesajı ünvanlayıb. Zelenski bununla bağlı “X” sosial şəbəkəsində paylaşım edib. “Türkiyə Prezidenti Rəcəb Tayyib Ərdoğanın Ukraynanın Müstəqillik Günü ərəfəsində söylədiyi müdrik və səmimi sözlərinə görə böyük minnətdarlıq hissi keçirirəm. Hörmətli Prezident, ölkələrimiz arasında strateji tərəfdaşlığın həm dövlətlərimiz, həm də regional və qlobal sabitlik baxımından həyati əhəmiyyət daşıdığı barədə sizinlə tam razıyam. Sülhün təmin olunması istiqamətindəki şəxsi səyləriniz üçün minnətdarıq və bütün sahələrdə əməkdaşlığımızı inkişaf etdirməyi səbirsizliklə gözləyirik” – deyə paylaşımda qeyd olunub.

Kiyev Ukrayna prezidenti Volodimir Zelenskinin Hindistana səfərinin təşkili və tarixlərin razılaşdırılması istiqamətində Yeni Dehli ilə danışıqları davam etdirir. Bu barədə Ukraynanın Hindistandakı səfiri Aleksandr Polişuk açıqlama verib.

Norveç Ukrayna üçün hava hücumundan müdafiə sistemlərinin alınmasına təxminən 7 milyard kron (695 milyon dollardan çox) ayıracaq. Bu barədə Norveç hökumətinin yaydığı bəyanatda qeyd olunub.