İsrailin "Kanal 12" televiziya kanalının yaydığı məlumata görə, ABŞ administrasiyasının rəsmi şəxsləri İsrail hökuməti ilə mövcud münasibətlərin kəskin şəkildə pisləşməsi fonunda, Netanyahunun yerinə alternativlər tapmaq məqsədilə İsrail müxalifətinin aparıcı liderləri ilə qeyri-rəsmi kommunikasiya kanallarının qurulması istiqamətində fəaliyyətə başlayıblar.

ABŞ-ın İsraildəki səfiri Mayk Hakabi amerikalı teleaparıcı Taker Karlson ilə müsahibəsi zamanı verdiyi bəyanatlarla böyük bir qalmaqala səbəb olub. VOA xəbər verir ki, səfir ABŞ-dakı xristian millətçi cərəyanlar arasında geniş yayılmış dini təfsirlərə söykənərək, İsrailin bütün Yaxın Şərq torpaqlarını ələ keçirməsinin "məqbul" olacağını bildirib.