BAKI, AzerVoice, Nailə Babazadə

Haitinin cənubunda Melissa qasırğasının səbəb olduğu güclü yağışlar nəticəsində La Digue çayının daşması fəlakətə yol açıb. Nəticədə azı 25 nəfər həyatını itirib.

AzerVoice xəbər verir ki, Petit-Goave adlı sahil qəsəbəsinin meri Jan Bertrand Subreme, çayın daşması nəticəsində çox sayda evin su altında qaldığını və onlarla insanın qalıqlar altında qaldığını bildirib. O, hökumətə xilasetmə əməliyyatları üçün təcili yardım çağırışı edib.

Qasırğa Karib hövzəsinin digər ölkələrinə də ciddi zərbə vurub. Yamaykada təxminən 25 min nəfər sığınacaqlara təxliyə edilib.

Yamayka təhsil naziri Dana Morris Dixon, adanın 77 faizində elektrik enerjisinin kəsildiyini, lakin su təchizatı sistemlərinin qasırğadan ciddi şəkildə zərər görmədiyini açıqlayıb.

Hökumət rəsmisi Fitz-Henley isə yerli radioya verdiyi açıqlamada, ölkənin qərbində ağacın bir körpənin üzərinə düşməsi nəticəsində azı bir nəfərin öldüyünü bildirib.

Sürəti saatda 295 kilometrə çatan və gücünə görə “5-ci kateqoriya” səviyyəsinə yüksələn Melissa qasırğası hazırda Haiti, Yamayka və Kubada təsirini davam etdirir.

Kuba Prezidenti Migel Dias-Kanel bildirib ki, ölkədə 735 mindən çox insan təhlükəsizlik məqsədilə təxliyə olunub.

ABŞ Dövlət Departamentinin rəsmiləri Associated Press agentliyinə verdikləri açıqlamada, Karib ölkələrinə yardım və axtarış-xilasetmə qruplarının göndərildiyini deyiblər.

Rəsmilərin sözlərinə görə, yardım qruplarının 24–48 saat ərzində Yamayka, Bahamalar və Dominikan Respublikasına çatması gözlənilir.