BAKI, VOA, Orxan Qədirzadə

ABŞ Prezidenti Donald Trampın Qrenlandiyanı ABŞ-a birləşdirmək istəyi və bu məqsədlə hərbi variantları istisna etməməsi NATO daxilində görünməmiş böhrana səbəb olub.

VOA xəbər verir ki, Danimarkanın DR dövlət yayımçısının əldə etdiyi gizli hərbi əməliyyat əmrinə əsasən, yanvarın 13-də Danimarka və müttəfiqləri adanın müdafiəsi üçün bölgəyə qoşun yeridib.

Rəsmi olaraq "Arctic Endurance" adlı NATO təlimi adı altında həyata keçirilən bu addımın əslində real hərbi yerləşmə olduğu üzə çıxıb. Əməliyyatda Danimarka birlikləri ilə yanaşı, Fransanın dağ atıcıları, Almaniya və İsveç əsgərləri də iştirak edib.

Danimarkalı hərbi mənbələr bildirir ki, ABŞ-ın Venesueladakı fəaliyyətindən sonra Qrenlandiya üçün də bənzər ssenarilər ciddi qəbul edilib. Birliklərin qan köçürmə avadanlıqları və partlayıcı maddələrlə təchiz edilməsi hazırlıqların miqyasını göstərir.

Trampın yanvarın 21-də hərbi gücdən istifadə etməyəcəyinə dair bəyanatından sonra gərginlik bir qədər səngisə də, NATO "Arctic Sentry" missiyası çərçivəsində bölgədəki hərbi mövcudluğunu qorumağa davam edir. Bu hadisə NATO-nun daxili birliyinin son illərdəki ən böyük sınağı kimi qiymətləndirilir.