BAKI, AzerVoice, Səməd Əyyubov

Avstraliya AUKUS sazişi çərçivəsində əldə edəcəyi nüvə sualtı qayıqları üçün infrastrukturun modernləşdirilməsinə böyük sərmayə ayıracaq.

AzerVoice xəbər verir ki, bu barədə Avstraliyanın müdafiə naziri Riçard Marlz məlumat verib.

Onun sözlərinə görə, hökumət 12 milyard Avstraliya dolları (təxminən 8 milyard ABŞ dolları) xərcləyərək gəmiqayırma və texniki xidmət müəssisələrini yeniləyəcək. Bu sərmayə on il ərzində qərbi Avstraliyanın Pert şəhərində yerləşən gəmiqayırma və təmir mərkəzinə yönəldiləcək.

Nazir əlavə edib ki, Henderson mərkəzi nüvə sualtı qayıqlarının texniki xidmətini həyata keçirmək üçün yüksək təhlükəsizlikli quru doklarla təchiz ediləcək. Bundan başqa, burada desant gəmiləri və Yaponiya istehsalı olan “Mogami” tipli freqatların istehsalı üçün yeni obyektlər də inşa olunacaq.

Modernləşdirilmiş infrastruktur, həmçinin ABŞ nüvə sualtı qayıqlarının da AUKUS sazişi çərçivəsində bu obyektlərdən istifadəsinə imkan verəcək.

Qeyd edək ki, Avstraliya hökuməti Henderson mərkəzi üçün maliyyələşdirməyə AUKUS sazişinin imzalanmasından dərhal sonra başlayıb. Saziş çərçivəsində Avstraliya 15 il ərzində ABŞ-dan üç “Virginia” tipli nüvə sualtı qayığı alacaq. Gələcəkdə isə ölkənin öz nüvə sualtı qayıqlarını istehsal edə bilməsi üçün infrastruktur yaradılması nəzərdə tutulur.

2021-ci ildə ABŞ və Böyük Britaniya ilə imzalanmış AUKUS sazişinin əsas məqsədi isə Çinin bölgədə artan təsirinə qarşı balans yaratmaqdır.