BAKI, AzerVoice
Sentyabr ayında Polşada keçirilməsi planlaşdırılan təlimlərdə NATO ölkələrindən təxminən 34 min hərbçi iştirak edəcək.
AzerVoice xəbər verir ki, bu barədə Polşa Silahlı Qüvvələrinin Baş Qərargahının mətbuat xidməti məlumat yayıb.
“Dəmir Müdafiəçi” (Iron Defender) kod adı ilə keçiriləcək təlimlər bu il Polşa Silahlı Qüvvələrinin planlaşdırdığı ən böyük və ən mühüm hərbi təşəbbüslərdən biridir. Təlimlər quru, dəniz, hava və kiberməkan daxil olmaqla müxtəlif sahələri əhatə edəcək” – deyə, məlumatda bildirilib.
Qeyd olunub ki, təlimlər zamanı Polşa Silahlı Qüvvələrinin bütün qoşun növləri NATO müttəfiqləri ilə birlikdə hücumun qarşısının alınması və Polşa ərazisinin müdafiəsi üzrə hazırlıq səviyyələrini yoxlayacaqlar.
“Təlimlərin əsas məqsədi Polşa Silahlı Qüvvələrinin operativ uyğunluğunun yoxlanılmasıdır. Bundan əlavə, regional planlar çərçivəsində operativ və taktiki qərarların təkmilləşdirilməsinə, eləcə də “Şərq qalxanı” adlı milli müdafiə proqramı ilə inteqrasiyaya xüsusi diqqət yetiriləcək” – deyə, məlumatda vurğulanıb.
Bildirilib ki, təlimlərin əsas əhəmiyyəti quru, hava, dəniz və kiberməkanda əməliyyatların inteqrasiyası olacaq. Bu isə NATO-nun potensialını və operativ imkanlarını artıracaq.
Təlimlər çərçivəsində Polşanın 1-ci zirehli diviziyası ilə ABŞ Silahlı Qüvvələrinin 5-ci korpusu arasında qərargah və komanda təlimləri də keçiriləcək.
Polşa Baş Qərargahı bildirib ki, “Iron Defender” təlimləri heç bir ölkəyə qarşı yönəlməyib. Məqsəd NATO müttəfiqlərinin birliyini, peşəkarlığını və döyüş qabiliyyətinin ardıcıl şəkildə artırılmasını nümayiş etdirməkdir. Bu təlimlər, həmçinin Polşa ordusunun dinamik transformasiyasını, müdafiə potensialının gücləndirilməsini və Mərkəzi və Şərqi Avropanın təhlükəsizlik sistemində əsas elementə çevrilməsini göstərir.
Bundan əvvəl Polşanın müdafiə naziri Vladislav Kosinyak-Kamış bildirmişdi ki, bu təlimlər Rusiya və Belarusun bu il üçün nəzərdə tutulmuş ən iri hərbi manevrləri olan “Qərb-2025” təlimlərinə cavab olacaq.
Həmçinin təlimlərin məqsədlərindən biri kimi Varşavanın şərqində yerləşən hərbi hissələrin daxil olduğu 18-ci diviziyanın müasir texnikanı – məsələn, M1 Abrams tanklarını mənimsəmə səviyyəsinin yoxlanılması qeyd olunub.