BAKI, AzerVoice

Rusiyanın Maqadan vilayətində itkin düşən Mi-8 helikopterinin qəzaya uğradığı və göyərtəsində olan bütün sərnişinlərin həlak olduğu təsdiqlənib.

AzerVoice xəbər verir ki, hadisə iyulun 14-də baş verib.

Helikopter Oxotsk şəhərindən Maqadana uçmalı idi. Lakin uçuş zamanı hava gəmisi radarlardan itib və pilot sonuncu dəfə 60 kilometr məsafəyə qədər olan mövqeyini xəbər verməyib. Bundan sonra helikopterlə əlaqə tamamilə kəsilib və təcili axtarış işlərinə başlanılıb.

Axtarışlara Rusiya Fövqəladə Hallar Nazirliyinə məxsus An-26 tipli təyyarə və Mi-8 helikopteri cəlb olunub. Lakin əlverişsiz hava şəraiti – xüsusilə duman və çətin relyef – xilasetmə işlərini çətinləşdirib.

İlkin araşdırmalara əsasən, helikopter dağlıq ərazidə qəzaya uğrayıb. Göyərtədə olan bütün sərnişin və heyət üzvlərinin həyatını itirdiyi bildirilib.

Hadisə ilə bağlı Rusiya İstintaq Komitəsi tərəfindən Rusiya Federasiyası Cinayət Məcəlləsinin 263.3-cü maddəsi üzrə cinayət işi açılıb. Bu maddə hava nəqliyyatının istismarı və təhlükəsizlik qaydalarının pozulması nəticəsində iki və ya daha çox şəxsin ölümünə səbəb olan halları əhatə edir.

Hazırda qəzanın dəqiq səbəblərinin müəyyən olunması üçün istintaq və texniki ekspertiza işləri davam etdirilir.