BAKI, AzerVoice

Tailand ABŞ-a yeni ticarət sazişi təklif etməyə hazırlaşır. Bu razılaşma amerikalı şirkətlərə ölkə bazarına daha geniş çıxış imkanı verəcək.

AzerVoice xəbər verir ki, bu barədə "Bloomberg" agentliyi məlumat yayıb.

Məlumata görə, Tailandın yeni təklifi ABŞ ilə ticarət profisitinin beş il ərzində 70 faiz azaldılmasını nəzərdə tutur. Hazırda bu profisit təxminən 46 milyard dollar təşkil edir. Tailand hakimiyyəti Vaşinqtonun 36 faizlik gömrük rüsumları tətbiq etməsinin qarşısını almaq istəyir. Bu məqsədlə ABŞ-ın kənd təsərrüfatı və sənaye şirkətləri üçün Tailand bazarına daha geniş çıxış təmin ediləcək və əksər Amerika məhsullarına tətbiq olunan tariflər ləğv olunacaq.

Tailand bu ticarət sazişi layihəsini iyulun 9-na qədər ABŞ Prezidenti Donald Trampın administrasiyasına göndərməyi planlaşdırır. Banqkok ümid edir ki, yeni razılaşma çərçivəsində Vaşinqton 10 faizlik tarif tətbiq edəcək. Lakin Tailandın maliyyə naziri Pxicay Çunhavatçira hesab edir ki, 20 faizə qədər olan tariflər də qəbuledilən ola bilər.

“Başımıza gələ biləcək ən pis şey – bölgədəki qonşularımızla müqayisədə daha pis bir saziş əldə etməyimiz olar” - deyə, o bildirib.

Xatırladaq ki, 2 aprel tarixində Tramp 185 ölkə və əraziyə qarşı gömrük rüsumlarının tətbiq olunduğunu elan edib. Ümumi tariflər qüvvəyə minib, fərdi tariflər isə aprelin 9-da qüvvəyə minib. Həmin gün ABŞ prezidenti bəyan etmişdi ki, 90 günlük müddətə bəzi cavab rüsumlarının qüvvəsi dayandırılır. Ağ Ev bunu ticarət məsləhətləşmələri ilə əlaqələndirmişdi. Bu müddət ərzində 10 faizlik universal tarif tətbiq olunur. 27 iyun tarixində Tramp qeyd etmişdi ki, ABŞ növbəti 1,5 həftə ərzində ayrı-ayrı saziş imzalanmayacaq ölkələri ikitərəfli ticarət şərtləri – yəni mallara tətbiq olunacaq gömrük tarifləri barədə məlumatlandıracaq.