BAKI,VOA

Birləşmiş Ərəb Əmirliklərinin Şarja əmirliyində sahibkarlıq fəaliyyətini dəstəkləmək və biznes mühitini canlandırmaq məqsədilə mühüm bir güzəşt kampaniyasına start verilib. Şarja Mülki Müdafiə İdarəsinin (Sharjah Civil Defence) rəsmi açıqlamasına görə, əmirlikdə iqtisadi aktivliyi qorumaq üçün xüsusi asanlaşdırma paketi hazırlanıb.

VOA ArabAZ-a istinadən xəbər verir ki, bu paket çərçivəsində mülki müdafiə qaydalarının pozulmasına görə yazılmış bütün cərimələrə və yanğınsöndürmə xərclərinə 50 faiz rəsmi endirim tətbiq olunacaq.

Sözügedən maliyyə güzəştləri 2019-cu ildən 2026-cı ilədək olan dövr ərzində kəsilmiş bütün cərimələri əhatə edir. Qərar 16 iyun 2026-cı il tarixindən etibarən qüvvəyə minib və üç ay müddətində etibarlı olacaq. İdarə rəsmiləri vətəndaşları və biznes sahiblərini ətraflı məlumat üçün rəsmi rabitə kanalları vasitəsilə əlaqə saxlamağa və ya birbaşa “06 516 3333” nömrəsinə zəng etməyə çağırıb.

Şarja Polisindən də biznesə böyük dəstək paketi

Həftənin əvvəlində Şarja İcraiyyə Şurasının qərarına uyğun olaraq Şarja Polisi də kommersiya müəssisələrinə dəstək məqsədilə bənzər layihə elan edib. Polisin təqdim etdiyi təşviq paketinə kommersiya fəaliyyəti üçün təhlükəsizlik icazələrinin (security permit) yenilənməsi rüsumlarının 50 faiz azaldılması, qeydə alınmış inzibati xətalar üzrə cərimə məbləğlərinə 50 faiz endirim edilməsi və təhlükəsizlik sistemlərinə abunə haqlarının yarıbayarı (50%) endirilməsi daxildir. Bundan əlavə, sahibkarlar işçilərin icbari təlim proqramları (mandatory training) üçün ödənilən haqların 20 faiz azaldılması güzəştindən də yararlana biləcəklər. Dövlət tərəfindən atılan bu koordinasiyalı addımlar Şarjanın regionda biznes üçün cəlbedici və çevik bir iqtisadi mərkəz statusunu qorumağa xidmət edir.