BAKI,VOA Yusif Şərifzadə

Livanın cənubunda təhlükəsizlik vəziyyəti ilə bağlı narahatlıqlar davam edir.

VOA xəbər verir ki, səhər saatlarından etibarən Sur şəhəri üzərində döyüş təyyarələrinin uçuş səsləri eşidilib. Eyni zamanda, şəhər üzərində aşağı hündürlükdə pilotsuz uçuş aparatının müşahidə olunduğu bildirilib.

Məlumata görə, Sur şəhəri və ətraf yaşayış məntəqələri də hava hücumlarının hədəfinə çevrilib. Cənubda yerləşən Mənsuriyyə qəsəbəsinə güclü hava zərbəsi endirilib. Qlailə və əl-Hənniyyə qəsəbələrinin isə artilleriya atəşinə məruz qaldığı qeyd olunub.

Bundan əlavə, Nəbatiyyə rayonu istiqamətində iki binanın hədəfə alındığı, onlardan birinin zərər gördüyü bildirilib.

Atəşkəs müddətinin uzadılmasına baxmayaraq, çox sayda sakin bölgənin təhlükəsiz olmadığını düşünərək əraziləri tərk etməyə başlayıb. Məcburi köçürülmə göstərişi verilən Sayda bölgələrindən də geniş insan axınının qeydə alındığı bildirilir.

Məlumata əsasən, hadisələr əsasən yaşayış məhəllələrində, biznes obyektlərində və bəzi hallarda səhiyyə müəssisələrinin yaxınlığında baş verir. Feldşerlər və təcili yardım avtomobillərinin də hücumlara məruz qaldığı qeyd olunur.

Hazırda bir milyondan çox insanın yaşayış yerlərini tərk etdiyi və bölgədə humanitar böhranın dərinləşdiyi bildirilir. Mövcud vəziyyətin yaxın zamanda sabitləşəcəyinə dair əlamətlərin müşahidə olunmadığı vurğulanır.