BAKI,VOA Yusif Şərifzadə
Livanın cənubunda yerləşən Nəbatiyyə şəhərində İsrailin həyata keçirdiyi hücum nəticəsində tibbi yardım briqadasının üzvləri arasında itkilərin olduğu açıqlanıb.
VOA xəbər verir ki, Livan Səhiyyə Nazirliyinin məlumatına əsasən, İsrail qüvvələrinin “birbaşa hədəfə aldığı” tibbi yardım qrupu arasında iki feldşer həlak olub, bir nəfər isə yaralanıb.
Nazirliyin Milli Xəbər Agentliyinə istinadən yaydığı bəyanatda bildirilib ki, feldşerlər yaralı bir şəxsi xilas etməyə çalışarkən əraziyə ikinci dəfə zərbə endirilib. Nəticədə yardım göstərilməyə çalışılan yaralı şəxs də həyatını itirib.
Rəsmi açıqlamada qeyd olunub ki, İsrailin intensivləşən hərbi əməliyyatları fonunda tibb işçiləri və səhiyyə obyektlərinə qarşı hücumlar davam edir.
Beynəlxalq humanitar təşkilatlar və hüquq müdafiə qurumları mülki səhiyyə personalının hədəfə alınmasını beynəlxalq humanitar hüququn pozuntusu kimi qiymətləndirərək bu cür hücumları kəskin şəkildə pisləyirlər.