BAKI,VOA, Nailə Babazadə
Livan Prezidenti Joseph Avn İsrail hücumlarının ölkə daxilində böyük bir humanitar fəlakətə səbəb olduğunu bildirib.
VOA xəbər verir ki, BMT-nin Qaçqınlar üzrə Ali Komissarı Bərham Salehi qəbul edən prezident bir milyondan çox livanlının didərgin düşdüyünü və ölkənin təcili yardıma ehtiyac duyduğunu vurğulayıb.
Avn qeyd edib ki, hücumların yaratdığı fəsadlar atəşkəs əldə edilsə belə uzun müddət davam edəcək. BMT rəsmisi isə öz növbəsində Livan xalqına dəstək mesajı verərək beynəlxalq ictimaiyyəti artan ehtiyacları qarşılamaq üçün səfərbər olmağa çağırıb.
Xatırladaq ki, İsrail ordusu martın 2-dən etibarən Livana qarşı genişmiqyaslı hava və dəniz hücumlarına başlayıb, daha sonra isə quru işğalını genişləndirmək qərarı alıb. Livan Səhiyyə Nazirliyinin məlumatına görə, hücumlar nəticəsində indiyədək 2 min 89 nəfər həyatını itirib. Hökumətin rəsmi rəqəmlərinə əsasən yerindən edilmiş şəxslərin sayı artıq 1 milyon 162 min nəfəri keçib.