BAKI,VOA, Nailə Babazadə

İsrail ordusu çərşənbə akşmı günü İran tərəfindən dəstəklənən "Hizbullah"a qarşı döyüşdüyü Livanın cənubunda "müdafiə xətti" boyunca quru qoşunlarının yerləşdirilməsini tamamladığını açıqlayıb.

VOA xəbər verir ki, ordu əsgərlərinin Livan ərazisinin daxilinə doğru irəlilədiyi ən uzaq nöqtə barədə coğrafi təfərrüat verməyib. İsrail mediası ordunun bu mərhələdə qoşunları İsrail-Livan sərhədindən təxminən 20 kilometr (12 mil) şimaldan daha dərinə yeritmək niyyətində olmadığını bildirib.

Hərbi bəyanatda deyilir: "Bu mərhələdə əsgərlər tank əleyhinə raket müdafiə xətti boyunca yerləşmələrini tamamlayıblar və ön müdafiə mövqelərini gücləndirmək, İsrailin şimalındakı sakinlər və icmalar üçün təhdidləri aradan qaldırmaq məqsədilə ərazidə əməliyyatları davam etdirirlər".

Müdafiə naziri İsrail Katz son həftələrdə bir neçə dəfə bəyan edib ki, İsrail şimal icmalarına raket, dron və ya mərmi hücumlarının qarşısını almaq üçün Livanın cənubunda, sərhəddən 30 kilometrə qədər uzaqlıqda axan Litani çayına qədər uzanan bir "təhlükəsizlik zonası" yaratmaq niyyətindədir. "Yediot Aharonot" qəzeti ordunun hökumətə "Livanın ilk sıra kəndlərini tank əleyhinə xəttə qədər dərin təhlükəsizlik zonası kimi nəzarətdə saxlamaq üçün əməliyyat planı" təqdim edəcəyini yazıb. "Haaretz" qəzeti isə hərbi mənbələrə istinadən bildirib ki, ordu Livanın cənubundakı qüvvələrini artırmağa hazırlaşır, lakin hazırda ölkənin daha dərinliklərinə doğru irəliləmək planı yoxdur.