BAKI,VOA, Nailə Babazadə

İsrail ordusunun Livanın müxtəlif bölgələrinə təşkil etdiyi son hücumlar nəticəsində azı 5 nəfər həyatını itirib.

VOA xəbər verir ki, Livanın rəsmi NNA xəbər agentliyinin məlumatına görə, Nebatiyə şəhərinin Burc Kalavay qəsəbəsinə endirilən iki zərbə nəticəsində bir nəfər dünyasını dəyişib. Eyni bölgənin Yuhmur əş-Şakif qəsəbəsində də bir nəfər İsrail atəşinin qurbanı olub. Ölkənin cənubundakı Sur şəhərinə bağlı Şaitiyə qəsəbəsində isə bir Suriya vətəndaşı həlak olub, daha 4 nəfər yaralanıb.

İsrail ordusunun cümə namazından sonra məsciddən çıxan insanları hədəf alması nəticəsində ölənlərin sayı 2-yə yüksəlib. Martın 2-dən etibarən Livanın şimalından atılan raketlərə cavab olaraq başlayan "Epic Fury" əməliyyatı çərçivəsində İsrail ordusu hava və dəniz zərbələrini intensivləşdirib. Paytaxt Beyrutu və ölkənin cənubunu hədəf alan İsrail komandanlığı hazırda quru işğalının miqyasını genişləndirmək qərarını icra edir.

Livan Səhiyyə Nazirliyinin yaydığı son rəsmi statistikaya görə, martın 2-dən bəri davam edən hücumlarda ümumilikdə 1345 nəfər yaşamını yitirib, 3935 nəfər isə müxtəlif dərəcəli yaralar alıb. Livan hökuməti ölkədə yaranmış humanitar böhranın miqyasının kəskin artdığını, məcburi köçkünlərin sayının artıq 1 milyon 162 mini keçdiyini bəyan edib. İsrailin hərbi hərəkətliliyi nəticəsində Livanın cənub rayonları demək olar ki, tamamilə boşaldılıb.