BAKI,VOA, Fərid Mikayılov
İraq Müdafiə Nazirliyi ölkədə yerləşən hərbi hava bazalarına qarşı həyata keçirilən hücumlara sərt reaksiya verib.
VOA xəbər verir ki, nazirliyin sosial şəbəkə platformasında yayımladığı açıqlamada son günlər Şəhid Ala Hərbi Hava Bazası və Şəhid Əli Fıleyyih Hərbi Hava Bazasına qarşı raket və pilotsuz uçuş aparatları ilə hücumların həyata keçirildiyi bildirilib.
Nazirlik qeyd edib ki, sözügedən hava bazaları tam şəkildə İraqın suverenliyi altında fəaliyyət göstərir və bu obyektlərdə hər hansı xarici hərbi qüvvə yerləşdirilməyib.
Açıqlamada vurğulanıb ki, bazalarda İraq Hərbi Hava Qüvvələrinə məxsus zabit və şəxsi heyət, həmçinin ölkənin hərbi aviasiya parkı yerləşir.
Müdafiə Nazirliyi belə hücumların təkrarlanacağı təqdirdə İraqın buna səssiz qalmayacağını və ölkənin təhlükəsizliyinə qarşı yönəlmiş hər hansı təhdidə qarşı bütün hüquqlarından istifadə edəcəyini bəyan edib.