BAKI, VOA, Orxan Qədirzadə
Regionda artan hərbi gərginlik fonunda Bəhreyn, ABŞ və Böyük Britaniya təhlükəsizlik vəziyyətini müzakirə etmək üçün təcili məsləhətləşmələr keçirib.
VOA xəbər verir ki, Bəhreyn Milli Kommunikasiya Mərkəzinin yaydığı məlumata görə, Manama “Təhlükəsizlik İnteqrasiyası və Rifah üzrə Kompleks Saziş”in ikinci maddəsini aktivləşdirərək fövqəladə məsləhətləşmələr prosesini başladıb. Məsləhətləşmələr saziş çərçivəsində fəaliyyət göstərən Müdafiə üzrə İşçi Qrupunun formatında keçirilib.
Bildirilib ki, bu addım İran tərəfindən həyata keçirilən raket və pilotsuz uçuş aparatları hücumlarından sonra atılıb. Bəhreyn hakimiyyətinin məlumatına görə, həmin hücumlar krallıq ərazisində mülki və yaşayış məntəqələrini hədəfə alıb.
Bəhreyn Xəbər Agentliyinin məlumatına əsasən, məsləhətləşmələrdə ölkənin milli təhlükəsizlik üzrə müşaviri və Ali Müdafiə Şurasının baş katibi general-leytenant Şeyx Nasir bin Həməd Əl-Xəlifə iştirak edib. O, ABŞ Mərkəzi Komandanlığının rəhbəri admiral Bred Kuper və Böyük Britaniya Silahlı Qüvvələrinin Baş Qərargah rəisi marşal Riçard Nayton ilə görüş keçirib.
Görüş zamanı tərəflər Bəhreynin suverenliyi və ərazi bütövlüyünə qarşı birbaşa təhdid kimi qiymətləndirilən hadisələrə qarşı koordinasiyalı müttəfiq cavabının zəruriliyini müzakirə ediblər. İştirakçılar tərəfdaş ölkələr arasında təhlükəsizlik əməkdaşlığının güclü olduğunu vurğulayaraq regional sabitliyə yönələn təhdidlərə qarşı birgə fəaliyyət öhdəliyini bir daha təsdiqləyiblər.
Müzakirələrdə həmçinin saziş çərçivəsində yaradılmış strateji tərəfdaşlıq mexanizmlərinin əhəmiyyəti vurğulanıb. Rəsmilər təhlükəsizlik əməkdaşlığının gücləndirilməsi və xarici təhdidlərə qarşı kollektiv çəkindirmə tədbirlərinin artırılması istiqamətində birgə fəaliyyətin davam etdiriləcəyini bildiriblər.
Digər tərəfdən, ABŞ Mərkəzi Komandanlığının rəhbəri admiral Bred Kuper sosial şəbəkədəki rəsmi hesabında İranın hücumlarını qəbuledilməz adlandırıb və Vaşinqtonun regiondakı tərəfdaşları ilə birlikdə mülki əhalini təhdid edən risklərə qarşı mübarizəni davam etdirəcəyini vurğulayıb.
Eyni zamanda Böyük Britaniyanın baş naziri Kir Starmer Bəhreyn kralı Həməd bin İsa Əl-Xəlifə ilə telefon danışığı zamanı bildirib ki, London regiona əlavə olaraq dörd “Tayfun” qırıcı təyyarəsi göndərəcək. Təyyarələrin Qətərdə yerləşdirilməsi və Bəhreyn üçün müdafiə hava örtüyünün gücləndirilməsi nəzərdə tutulur.
Bəhreyn rəsmiləri ölkənin regional sabitliyin qorunmasına, vətəndaşların təhlükəsizliyinin təmin edilməsinə və dövlətin suverenliyinin müdafiəsinə sadiq olduğunu vurğulayıb. Eyni zamanda beynəlxalq ictimaiyyəti İranın mülki əraziləri hədəfə aldığı iddialarının ciddiliyini nəzərə almağa və müttəfiqlərin vahid cavab verməsinin vacibliyini qəbul etməyə çağırıb.