BAKI, AzerVoice, Orxan Qədirzadə

Səudiyyə Ərəbistanı Krallığının Xarici İşlər Nazirliyi 9 yanvar 2026-cı il tarixində İsrail rəsmisinin Somali Federal Respublikasının ayrılmaz hissəsi olan Somaliland bölgəsinə səfərini qanunsuz hesab edən birgə bəyanat yayıb.

AzerVoice xəbər verir ki, bəyanat Səudiyyə Ərəbistanı, Əlcəzair, Banqladeş, Komor adaları, Cibuti, Misir, Qambiya, İndoneziya, İran, İordaniya, Küveyt, Liviya, Maldiv adaları, Nigeriya, Oman, Pakistan, Fələstin, Qətər, Somali, Sudan, Türkiyə və Yəmənin xarici işlər nazirləri, eləcə də İslam Əməkdaşlıq Təşkilatı tərəfindən imzalanıb.

Nazirlər 6 yanvar 2026-cı ildə İsrail rəsmisinin Somalilanda etdiyi səfəri Somalinin suverenliyi və ərazi bütövlüyünün açıq şəkildə pozulması kimi qiymətləndirib. Sənəddə vurğulanıb ki, bu addım beynəlxalq hüququn, BMT Nizamnaməsinin və diplomatik normaların kobud şəkildə pozulmasıdır.

Birgə bəyanatda xatırladılıb ki, 27 dekabr 2025-ci il tarixində də İsrailin Somalilandı tanımasına qarşı kəskin etiraz ifadə olunmuşdu. Nazirlər separatçı gündəmlərin təşviqinin qəbuledilməz olduğunu və Afrika Buynuzu kimi onsuz da həssas regionda gərginliyi daha da artırdığını qeyd ediblər.

Sənəddə Somalinin beynəlxalq hüquqa sadiqliyi, sülhpərvər diplomatik mövqeyi və konstruktiv beynəlxalq əməkdaşlıq xətti müsbət qiymətləndirilib. Eyni zamanda, imza atan ölkələr Somalinin suverenliyini, milli birliyini və ərazi bütövlüyünü qorumaq üçün atdığı diplomatik və hüquqi addımlara dəstəyi davam etdirəcəklərini bəyan ediblər.

Birgə bəyanatda İsrailə çağırış edilərək, Somalinin suverenliyinə və ərazi bütövlüyünə tam hörmət göstərməsi, beynəlxalq hüquq çərçivəsində öhdəliklərinə əməl etməsi və Somalilandın tanınması ilə bağlı qərarın dərhal ləğv edilməsi tələb olunub.