BAKI, AzerVoice
Azərbaycanda ilk dəfə keçiriləcək UFC döyüş gecəsinin fəxri qonaqları – tanınmış döyüşçülər Həbib Nurməhəmmədov, İslam Maxaçov, Usman Nurməhəmmədov və Umar Nurməhəmmədov “Qarabağ” futbol klubunun bazasını ziyarət ediblər.
AzerVoice xəbər verir ki, qonaqları klubun Baş direktoru və İdarə Heyətinin üzvü Emrah Çelikel, İdarə Heyətinin üzvü Asif Əsgərov və baş məşqçi Qurban Qurbanov qarşılayıb.
Görüş zamanı MMA və futbol mövzularında maraqlı fikir mübadiləsi aparılıb.
UFC-nin ulduzları klubun təlim-məşq bazası ilə tanış olub, fitnes zalında futbolçuların hazırlıq prosesini izləyiblər.
Onlar Qarabağ futbolçuları ilə görüşərək hər iki tərəfə uğurlar arzulayıblar. Görüşün sonunda qonaqlara klubun rəsmi formaları və xatirə hədiyyələri təqdim edilib, xatirə fotoları çəkilib.
Qeyd edək ki, UFC-nin Bakıdakı döyüş gecəsi iyunun 21-də baş tutacaq. Həmin gecədə Azərbaycanlı döyüşçü Rafael Fiziyev də rinqə çıxacaq. O da bir neçə gün əvvəl Qarabağ klubunun qonağı olub.