Bakı,AzerVoice
Britaniyanın yeni Baş Qərargah rəisi general Roli Uoker deyib ki, ölkəsi üç il ərzində müharibəyə hazır olmalıdır. General Worker, "qəzəbli Rusiyanın" başçılıq etdiyi "getdikcə qeyri-sabit" dünyada bəzi təhlükələr barədə xəbərdarlıq edib.
Yaxın gələcəkdə müharibə ehtimalına diqqət çəkən General Worker, Britaniya ordusunun mümkün müharibəyə hazırlaşmaq və müharibədən qaçmaq üçün “kifayət qədər vaxtının” olduğunu, lakin ordunun döyüş gücünün 2027-ci ilə qədər iki dəfə, on il ərzində isə üç dəfə artması lazım olduğunu söyləyib.
General Worker yeni vəzifəsində jurnalistlərə verdiyi ilk açıqlamada Rusiyanın 2022-ci ilin fevral ayından Ukraynanı dəstəkləyən Qərb ölkələrinə qarşı qisas ala biləcəyi barədə xəbərdarlıq edib. Britaniya Baş Qərargah rəisi rusların bu müharibədən zəifləyərək çıxacağını, lakin “çox təhlükəli” olmağa davam edəcəklərini bildirib.
Bundan əlavə, Çinin Tayvanı geri almaq niyyəti və İranın nüvə bombası əldə etmək cəhdi barədə də xəbərdarlıq edən General Worker qeyd edib ki, Moskva, Pekin və Tehran fərqli məqsədlərinə çatmaq üçün silah və texnologiyanı paylaşırlar.
Böyük Britaniya ordusu müvəffəqiyyətlə yenidən qurularsa və strateji bir maneə yaradarsa, döyüşə girmək məcburiyyətində qalmayacağını ifadə edən General Worker, İngiltərə ordusunun bu gün 'orta boy' olduğunu və şəxsi heyətin sayını çox sürətlə artırmalı və modernləşdirməyə ehtiyac olduğunu qeyd edib.
General Worker orduya daha çox xərc tələb etmir, lakin o, ordunu özündən üç dəfə böyük olan rəqibini məğlub edə biləcək səviyyəyə çatdırmaq istəyir. Prinsipcə, bu, "daha uzun məsafələrdə daha sürətli atəş gücü" deməkdir.
General Worker-in bu açıqlamalarından təxminən bir həftə əvvəl, müdafiə naziri Con Healey, ordunun hazırkı vəziyyətini izləmək üçün "radikal" araşdırmaya başladı və orduda böyük islahatlara ehtiyac olduğunu bildirdi.
Nazir Healey-in fikrincə, ölkə yeni dövrün astanasındadır və texnologiyanın müharibənin xarakterini dəyişdirdiyi bir dünyada müdafiə sahəsində müasir dövrə ehtiyacı var.
Böyük Britaniya hazırda Ümumi Daxili Məhsulunun (ÜDM) 2,3 faizini müdafiəyə xərcləyir. Baş nazir Keir Starmer, rəsmilərin bunu 2,5 faizə çatdırmaq üçün yol xəritəsi hazırlayacağını bildirib. Lakin baş nazir bu məsələ ilə bağlı tarix verməkdən yayınıb.
General Worker orduda kadr, texnika, ehtiyat, təlim və texnologiya baxımından çatışmazlıqların olduğunu etiraf edib, lakin buna səbəb olan maliyyə çətinliklərinin yaxşı və effektiv şəkildə idarə olunduğunu bildirib.
200 il əvvəl, 1823-cü ildə 20 milyon əhalisi olan bir ölkədə ingilis ordusunun 72 min əsgəri var idi. Bu gün, 2024-cü ildə, təxminən 70 milyon əhalisini qorumaq üçün təxminən 73 min əsgəri var.
