Bakı, AzerVoice

Alimlər xəstələrin öz qanından istifadə edərək qırıq sümükləri müalicə edə bilən innovativ implant hazırlayıblar.

AzerVoice xəbər verir ki, Nottingem Universitetində aparılan bu araşdırma regenerativ tibb sahəsində yeni bir dövrün başlanğıcı hesab olunur.

İnsan orqanizmi təbii yollarla kiçik zədələri sağaltmaq qabiliyyətinə malikdir, lakin bu mexanizm ciddi qırıqlar üçün yetərli deyil. Bu problemi həll etmək məqsədilə alimlər bədənin öz bərpa mexanizmini gücləndirən material hazırlayıblar.

Bu material, toxuma bərpasında mühüm rol oynayan "regenerativ hematoma" (RH) adlanan strukturların formalaşmasını dəstəkləyir. Tədqiqat qrupu insan qanına peptid amfifillər adlanan xüsusi zülallar əlavə edərək RH-nin daha təsirli və davamlı şəkildə yaranmasını təmin edib.

Araşdırma heyvan modelləri üzərində aparılıb və müsbət nəticələr əldə edilib.

Dr. Cosimo Ligorio, qanla hazırlanmış implantların xəstələrdən asanlıqla əldə edilə biləcəyini və yüksək regenerativ potensiala malik olduğunu bildirib.

Hələlik bu üsul insanlarda genişmiqyaslı şəkildə sınaqdan keçirilməyib. Lakin ilkin nəticələr, regenerativ tibb sahəsində bu yanaşmanın geniş potensiala malik olduğunu göstərir.