BAKI, VOA, Orxan Qədirzadə

Dünya hərb tarixində itki vermədən, əksinə, əsgər sayını artıraraq geri dönən yeganə ordu Lixtenşteynə məxsusdur. 1866-cı ildə baş verən bu hadisə ölkənin hərbi siyasətini kökündən dəyişdirərək, onun 150 ildən artıqdır ordusuz qalmasına səbəb olub.

Prussiya və Avstriya arasındakı müharibədə iştirak edən Lixtenşteyn birliyi tarixin ən maraqlı "zəfərinə" imza atıb.

Lixtenşteynin dövlət kimi formalaşması Səlib yürüşlərinə qədər uzanır. Cəmi 7 əsgərlə yürüşə qatılan Lixtenşteyn sülaləsi Müqəddəs Roma-German İmparatoru tərəfindən knyazlıqla mükafatlandırılıb. Lakin ölkənin ən məşhur hərbi hadisəsi 1866-cı ildə, 80 nəfərlik "ordu" ilə Avstriyanın yanında müharibəyə qatılmasıdır. Prussiyalılarla döyüşmək istəməyən Lixtenşteyn əsgərləri İtaliya sərhədindəki bir keçidi qorumaqla vəzifələndiriliblər.

İki ay yarım davam edən "keçid keşiyində" nə bir düşmən gəlib, nə də bir atəş açılıb. Müharibə bitdikdən sonra paytaxt Vaduza dönən ordu siyahıya alınarkən hər kəsi heyrət bürüyüb: cəbhəyə 80 nəfərlə gedən ordu geriyə 81 nəfərlə qayıdıb. Məlum olub ki, müharibəsiz zonada gizlənən bir avstriyalı fərari zabit Lixtenşteyn əsgərlərinə qoşularaq onlarla birlikdə ölkəyə gəlib. Bu hadisədən sonra Lixtenşteyn rəhbərliyi "ordumuz onsuz da savaşmır, boşuna xərc çəkirik" deyərək hərbi qüvvələri ləğv edib və İsveçrə ilə əməkdaşlıq edərək bitərəflik siyasətinə keçib.