BAKI,VOA Orxan Qədirzadə
Azərbaycan rep musiqisinin tanınmış nümayəndələrindən biri olan Hüseyn Dərya həm yaradıcılığı, həm də Birinci Qarabağ müharibəsində iştirakı ilə yadda qalan sənətkarlardandır. Musiqi fəaliyyəti ərzində müxtəlif janrları bir araya gətirən ifaçı Azərbaycan repinin inkişafına mühüm töhfələr verib.
Hüseyn Dərya (Hüseyn Cahangir oğlu Muradov) 29 iyun 1975-ci ildə Bakının Bakıxanov qəsəbəsində anadan olub. Atası Laçından, anası isə Kəlbəcərdən olan, eyni zamanda Ermənistan azərbaycanlısı ailəsində böyüyən sənətkar ilk təhsilini Nərimanov rayonundakı 4 nömrəli fars təmayüllü məktəbdə alıb. Həmin məktəbdə oxuduğu illərdə şeir və vəznə marağı formalaşıb.
Sonradan Bakı Dövlət Universitetinə qəbul olunsa da, ali təhsilini davam etdirməyərək Birinci Qarabağ müharibəsinə yollanıb. O, dörd il iki ay hərbi xidmət keçərək döyüşlərdə iştirak edib.
Hüseyn Dərya peşəkar musiqi fəaliyyətinə 2000-ci ildən başlayıb. O, Azərbaycan rep musiqisinin geniş auditoriyaya çatdırılmasında önəmli rol oynayıb və yaradıcılığı dövründə müğənnilər Elariz Məmmədoğlu, İlhamə Quliyeva, Vahid Qədim və digər sənət adamları ilə birgə layihələr həyata keçirib.
İfaçının diskoqrafiyasına üç studiya albomu daxildir. Onun ilk albomu "2 Həyat" 2002-ci ildə işıq üzü görüb. Albomda "Həyat", "Sevmirəm", "Dərviş rep", "Xatirə", "Rep meyxana", "Soy", "Sevən ürəyim", "Məhəlləmiz (Kef elə)", "İnsan" və "Rep-Meyxana" (Remiks) kimi mahnılar yer alıb.
2004-cü ildə təqdim olunan "Keçdi günlər" albomuna isə "Oyan bəxtim", "Dost", "Çingiz Mustafayev", "Rep oxu", "Məktub", "Ay Can-Ay Can", "Sənsən", "Kişi kimi", "Çal-Çağır", "Kim Kimdir?", "Bir göz qırpımında" və "Zəfər nəğməsi" daxil edilib. Albomdakı "Oyan bəxtim" mahnısı İlhamə Quliyeva ilə duet şəklində ifa olunub.
Hüseyn Dərya yaradıcılığı dövründə bir neçə dəfə sui-qəsd cəhdinə məruz qalıb.
2014-cü il martın 14-də gecə saatlarında Bakının Xəzər rayonu ərazisində idarə etdiyi "Opel Astra" markalı minik avtomobili eyni istiqamətdə hərəkət edən "KamAZ" markalı yük avtomobilinə çırpılıb. Ağır xəsarət alan sənətkar xəstəxanaya çatdırılsa da, martın 15-də səhər saatlarında vəfat edib.
Hüseyn Dərya doğulub boya-başa çatdığı Bakıxanov qəsəbəsində yerləşən qəbiristanlıqda dəfn olunub.
Azərbaycan rep musiqisinin formalaşmasında mühüm rol oynayan Hüseyn Dərya özünəməxsus ifa tərzi, vətənpərvərlik mövzulu əsərləri və fərqli yaradıcılıq üslubu ilə ölkənin musiqi tarixində iz qoymuş sənətkarlardan biri hesab olunur.