BAKI,VOA
Lüks italyan avtomobil istehsalçısı "Maserati" brendin gələcək strategiyasını və yaxın dövr üçün model xəttini müəyyən edən yeni 2027-ci model ili yeniliklərini nümayiş etdirib. Şirkətin əsas satış həcmini təşkil edən yenilənmiş GranTurismo, GranCabrio və Grecale modelləri restaylinq olunmuş radiator barmaqlıqları və təzələnmiş eksternyer elementləri ilə ictimaiyyətə təqdim edilib. Bu üçlük Maseratini yaxın gələcəyə daşıyacaq əsas sütunlar hesab olunur.
VOA xəbər verir ki, təqdimat mərasimindən sonra təşkil olunan sual-cavab sessiyasında şirkətin rəhbər şəxsləri brendin gələcək planları, V8 mühərriklərinin taleyi və əfsanəvi "Quattroporte" sedanının geri dönüşü barədə mühüm açıqlamalar veriblər.
Nettuno V6 prioritetdir, lakin V8 tamamilə unudulmayıb
Maseratinin əməliyyat direktoru Santo Ficiili hazırda dünyanın ən yaxşı altısilindrli mühərriklərindən birinə - fəxrlə qeyd etdikləri Nettuno V6 aqreqatına sahib olduqlarını bildirib. Komandanın yaxın hədəfi bu mühərrikin texniki potensialını maksimum dərəcədə stimullaşdırmaqdır. Bununla belə, lüks avtomobil bazarında daha böyük həcmli güc qurğularından imtina etmək istəməyən xüsusi bir müştəri kütləsinin mövcudluğunu qəbul edən Ficiili: "Əlbəttə ki, biz gələcək üçün V8 mühərrik strukturunu da masada saxlayırıq" - deyə vurğulayıb.
Mühəndislik departamentinin rəhbəri Davide Danesin də bu fikri dəstəkləyərək, şirkətin yüksək performanslı V8 mühərriki hazırlamaq üçün lazımi bilik və texnoloji infrastruktura sahib olduğunu təsdiqləyib.
Plug-in Hibrid (PHEV) variantı qəti şəkildə rədd edilir
Maseratinin gələcək mühərrik strategiyasında plug-in hibrid (təkrar şarj olunan) modellərə yer yoxdur. Rəsmi yol xəritəsində gələcək bir V8 modelinin peydə olması, hər hansı bir PHEV modelinin istehsala buraxılmasından daha real görünür. Hazırda brend 48 voltluq yumşaq hibrid (mild-hybrid) arxitekturasını genişləndirməyi və tam hibrid güc qurğularını tətbiq etməyi planlaşdırır.
PHEV texnologiyasından imtinanın əsas səbəbi kimi batareyaların avtomobilə verdiyi əlavə çəki (kütlə) və müştəri vərdişləri göstərilib. Mühəndis Davide Danesin qeyd edib ki, bir çox istifadəçi plug-in hibrid avtomobilləri müntəzəm olaraq cərəyan mənbəyinə qoşmur, bu isə ağır batareya dəstlərinin avtomobildə sadəcə olaraq əbəs yerə yer tutmasına və çəki artımına səbəb olur.
Quattroporte fərqli bir konseptlə geri qayıda bilər
Maseratinin vizit kartı sayılan "Quattroporte" sedanının istehsalı hazırda qeyri-müəyyən müddətə dayandırılsa da, rəhbərlik sedan ban növünün gələcəyinə inanır. Şirkətin baş marketoloqu Kristiano Fiorio gələcəkdə dördqapılı flaqman modelinin mütləq geri qayıdacağını ifadə edib.
Forionun sözlərinə görə, müasir dövrdə yeni yetişən "Gen Z" (Z nəsli) və "Gen Alpha" (Alfa nəsli) nümayəndələri arasında retro dizaynlara doğru ciddi bir meyil müşahidə olunur. Bu gənc kütlə son onilliklərdə populyarlaşan həddindən artıq böyük və rəqəmsallaşdırılmış krossoverlərdən (SUV) yorulmağa başlayıb. "Dünya artıq SUV modelləri ilə doludur" deyən Fiorio, klassik idarəçi sedanı arzulayan alıcılar üçün yeni bir platformanın işlənildiyini və gələcək sedan anlayışının zamanın tələblərinə uyğun olaraq vizual transformasiyaya məruz qalacağını gizlətməyib.