BAKI, VOA
Avtomobil həvəskarlarının Infiniti markasından gözləntiləri son illər tam qarşılanmasa da, görünür, şirkət bu vəziyyəti kökündən dəyişməyə və "at gücü müharibələrinə" qoşulmağa hazırlaşır. Bu iddialı planın mərkəzində markanın flaqman SUV modeli olan QX80 dayanır.
VOA xəbər verir ki, 2026-cı il Nyu-York Beynəlxalq Avtosalonunda "Nissan" və "Infiniti"nin ABŞ üzrə marketinq və satış üzrə vitse-prezidenti Tiaqo Kastro (Tiago Castro) "The Drive" nəşrinə eksklüziv açıqlamasında bildirib ki, şirkət "ideal variantda" 700 at güclü QX80 təqdim edə bilər. Lakin burada əsas məsələ zamanlamadır.
Kastro qeyd edib ki, hazırda "Cadillac" şirkəti 682 at güclü V8 mühərrikli "Escalade V" modelini müştərilərin tələbatını çatdıracaq sürətlə istehsal edə bilmir. Bu isə o deməkdir ki, ABŞ bazarında (və ümumilikdə dünyada) həddindən artıq güclü SUV modellərinə "nəhəng" tələbat var.
"Biz bir performans xətti (performance line) üzərində işləyirik. İnanırıq ki, Infiniti brendi bu tip avtomobillərlə yaxşı uyğunlaşacaq. QX80 hazırda inkişaf etdirdiyimiz potensial modellərdən biridir. Dəqiq tarix deyə bilmərəm, amma bizi izləməyə davam edin," – deyə Kastro bildirib.
Red Sport Erası: 600 yoxsa 700 at gücü?
Məlumata görə, Infiniti yeni "Red Sport" performans erasını başlatmaq üçün 600 at güclü (və bəlkə də 24 düymlük disklərə malik) daha "isti" bir QX80 hazırlayır. Kastronun sözlərinə görə, bu yeni era həmçinin mexaniki sürətlər qutusu variantı olan "yüksək at güclü" idman sedanını da əhatə edəcək.
"Məsələ burasındadır ki, hazırkı QX80 450 at gücünə malikdir. Biz bundan əhəmiyyətli dərəcədə üstün bir şey istəyirik. 700 at gücümüz olmalıdıırmı? İdealda bəli. Amma bunu dərhal etməliyik, yoxsa arada orta bir model çıxarmalıyıq? Hazırda müzakirə olunan budur. Məsələn, 600 at güclü QX80-ə tələbat varmı? Bəli, buna nəhəng tələbat var," – deyə vitse-prezident vurğulayıb.
Qeyd edək ki, bu ideya sadəcə xəyal deyil. Ötən ilin noyabrında SEMA sərgisində Infiniti "Nissan GT-R" mühərriki ilə təchiz edilmiş 1000 at güclü QX80 konseptini nümayiş etdirmişdi. "Escalade V" satışlarının uğuru Infiniti rəhbərliyi üçün bu cür riskli layihələrin biznes baxımından səmərəli olduğunu sübut edir. Kastro əlavə edib ki, 700 at güclü model hədəf olsa da, bu, böyük ehtimalla mərhələli şəkildə həyata keçiriləcək.