Heydər Əliyev Fondu ilə Vatikan arasında uzun illərdir davam edən əməkdaşlıq yeni mərhələyə qədəm qoyur. Leyla Əliyevanın Vatikan Apostol Kitabxanası və Apostol Arxivinin rəhbəri Covanni Çezare Paqatzi ilə görüşündə tarixi irsin qorunması və elmi əməkdaşlığın genişləndirilməsi əsas müzakirə mövzusu olub. Tərəflər Azərbaycanla bağlı nadir əlyazmaların araşdırılması, bərpası və rəqəmsallaşdırılması sahəsində görülən işləri yüksək qiymətləndiriblər. Görüşdə gələcəkdə bu istiqamətdə yeni layihələrin həyata keçirilməsi və birgə təşəbbüslərin hazırlanması barədə razılıq ifadə olunub. Eyni zamanda, 2026-cı ildə azərbaycanlı alimlərin Vatikan arxivlərində tədqiqat aparması və Azərbaycan tarixinə dair qiymətli sənədləri araşdırması planlaşdırılır. Müzakirələr zamanı azərbaycanlı tələbələrin Vatikanda kitabxanaçılıq və arxiv işi üzrə təhsil imkanlarının yaradılması məsələsi də diqqət mərkəzində olub. Görüş qarşılıqlı hədiyyələrin təqdim olunması və Heydər Əliyev Mərkəzindəki sərgilərlə tanışlıqla davam edib. Tərəflər mədəni irsin qorunması və elmi əməkdaşlığın gələcəkdə daha da genişləndirilməsinin əhəmiyyətini vurğulayıblar.