Rumıniya Xarici İşlər Naziri Oana Toiu sabah Ankaraya ilk rəsmi səfərini edəcək. Görüş zamanı Türkiyə və Rumıniya arasında strateji tərəfdaşlıq münasibətlərinin inkişafı, ticarət və iqtisadi əlaqələrin dərinləşdirilməsi, nəqliyyat və enerji sahəsində əməkdaşlığın genişləndirilməsi müzakirə olunacaq. Nazir Hakan Fidanın iki ölkə arasında insan əlaqələrinin, xüsusilə Rumıniyada yaşayan türk və tatar icmalarının rolu barədə fikirlərini bölüşəcəyi gözlənilir.

Türkiyənin xarici işlər naziri Hakan Fidan Finlandiyaya səfəri çərçivəsində Finlandiya Parlamentində keçirilən tədbirdə çıxış edib. Bu barədə Türkiyə Xarici İşlər Nazirliyi sosial şəbəkə hesabında paylaşım yayıb. Bildirilib ki, Fidan paytaxt Helsinkidə parlament üzvləri və rəsmi şəxslərlə görüş zamanı aktual regional məsələlər, ikitərəfli münasibətlər və beynəlxalq əməkdaşlıq mövzularında fikirlərini bölüşüb.

Türkiyənin xarici işlər naziri Hakan Fidan, Finlandiyada keçirdiyi rəsmi görüşlərdən sonra həmkarı Elina Valtonen ilə birgə mətbuat konfransı keçirib. Fidan bildirib ki, Qəzzaya humanitar yardımların girişi hələ də kifayət qədər deyil və bu istiqamətdə tədbirlərin daha səmərəli hala gətirilməsi üçün işlər davam edir. Nazir əlavə edib ki, Türkiyə atəşkəsin qorunması və humanitar vəziyyətin yaxşılaşdırılması üçün bütün imkanlarını səfərbər edib.

Türkiyənin xarici işlər naziri Hakan Fidan 4–5 noyabr tarixlərində Finlandiyaya rəsmi səfər edəcək. Səfər çərçivəsində o, Finlandiyanın xarici işlər naziri Elina Valtonen və parlament sədri Yussi Halla-Aho ilə görüşəcək. Diplomatik mənbələrdən bildirilib ki, Hakan Fidan bu ilin may ayında Antalyada keçirilən NATO xarici işlər nazirlərinin qeyri-rəsmi toplantısı çərçivəsində Finlandiya xarici işlər nazirini Türkiyədə qəbul etmişdi.

İstanbulda Türkiyənin xarici işlər naziri Hakan Fidanın sədrliyi ilə keçirilən Qəzza mövzusuna həsr olunmuş yüksək səviyyəli toplantı başa çatıb. AzerVoice xəbər verir ki, toplantıda İndoneziya, Pakistan, Səudiyyə Ərəbistanı və İordaniyanın xarici işlər nazirləri, eləcə də BƏƏ və Qətərin rəsmi nümayəndələri iştirak ediblər.

Türkiyənin Xarici İşlər naziri Hakan Fidan İstanbulda HƏMAS Siyasi Büro üzvləri ilə görüş keçirib. Görüş zamanı Qəzzadakı atəşkəs vəziyyəti, bölgədə humanitar yardıma olan tələbat və münaqişənin təsirlərinin azaldılması istiqamətində atıla biləcək addımlar müzakirə olunub. Həmçinin tərəflər bölgədə sülhün və sabitliyin təmin olunmasının əhəmiyyətini vurğulayıblar. Görüşün məqsədi, Qəzza ilə bağlı davam edən diplomatik səyləri gücləndirmək və humanitar yardımın daha effektli şəkildə çatdırılmasını təmin etmək olub.

Türkiyə Xarici İşlər Naziri Hakan Fidan 2 noyabr 2025-də İraqa rəsmi səfər edəcək. Səfər çərçivəsində ikitərəfli münasibətlər və bölgədəki aktual inkişaflar müzakirə olunacaq. Xarici İşlər Nazirliyinin mənbələrinin verdiyi məlumata görə, Nazir Fidan son dəfə 10 oktyabr 2025-də Ankarada İraq Baş nazirinin müavini və Xarici İşlər naziri Fuad Hüseyin ilə Su Ehtiyatları naziri Avn Diyab Abdullahı qəbul etmişdi. Bu dəfə Fidanın Bağdada həyata keçirəcəyi səfər həmin görüşdən üç həftə sonra baş tutacaq.

27 oktyabr 2025-ci il tarixində Azərbaycan Respublikasının xarici işlər naziri Ceyhun Bayramov Türkiyə Respublikasının ölkəmizdə səfərdə olan xarici işlər nazirinin müavini Ayşe Berris Ekincini qəbul edib. Görüş zamanı Azərbaycan-Türkiyə müttəfiqliyindən irəli gələn mövzular, habelə regional və beynəlxalq təhlükəsizlik məsələləri müzakirə olunub.

Türkiyənin xarici işlər naziri Hakan Fidan öz müavini Nuh Yılmazı Türkiyənin Suriyadakı səfiri vəzifəsinə təyin edib. İndiyə qədər Türkiyə Suriyada yalnız müvəqqəti işlər vəkili səviyyəsində təmsil olunurdu. Nuh Yılmazın səfir təyin olunması, mühüm diplomatik jest kimi qiymətləndirilir. Yılmaz 2024-cü ilin may ayından nazir müavini vəzifəsini icra edib. O, nazir Fidan kimi Türkiyə Milli Kəşfiyyat Təşkilatının (MİT) sabiq əməkdaşıdır və İngilis dilini mükəmməl bilir. Daha əvvəl Vaşinqtonda bir neçə diplomatik vəzifə tutub və ABŞ-da dərs deyib.

Türkiyənin xarici işlər naziri Hakan Fidan İordaniya xarici işlər naziri Əymən əs-Safedi və Misir xarici işlər naziri Bədr Abdulati ilə telefon danışığı aparıb.

Türkiyə Prezidenti Rəcəb Tayyib Ərdoğan və Oman Sultanı Heysəm bin Tariqin Al Alam Sarayında başçılıq etdikləri heyətlərarası görüşdən sonra iki ölkə arasında müxtəlif sahələri əhatə edən əməkdaşlıq sazişləri imzalanıb. Əvvəlcə, “Türkiyə Respublikası Hökuməti ilə Oman Sultanlığı arasında Koordinasiya Şurasının yaradılması barədə ortaq bəyanat” Türkiyənin xarici işlər naziri Hakan Fidan və Oman xarici işlər naziri Sayyid Badr bin Hamad Al Busaidi tərəfindən imzalanıb.

Türkiyə Respublikasının xarici işlər naziri Hakan Fidan və Milli Təhlükəsizlik Xidmətinin (MİT) rəhbəri İbrahim Kalın Qətərin paytaxtı Dohada “HƏMAS” hərəkatının rəhbərləri ilə görüş keçiriblər. Danışıqlar zamanı Qəzza zolağında davam edən humanitar böhran, atəşkəsin davam etdirilməsi və bölgədə sabitliyin bərpası istiqamətində mümkün vasitəçilik addımları müzakirə olunub.