Bakı, AzerVoice
Azərbaycan İlahiyyat İnstitutunda (Aİİ) 8 Noyabr – Zəfər Gününə həsr olunmuş tədbir keçirilib.
AzerVoice xəbər verir ki, bu barədə Aİİ-dan bildirib.
Tədbirdə Aİİ-nin və Bakı İlahiyyat Kollecinin (BİK) müəllim-tələbə heyəti iştirak edib.
Azərbaycan Respublikasının Dövlət Himni səsləndirilib,
dövlətimizin ərazi bütövlüyü uğrunda şəhid olanların xatirəsi
birdəqiqəlik ehtiram sükutu ilə yad edilib.
Aİİ rektoru Aqil Şirinov açılış nitqi ilə çıxış edərək, tədbir
iştirakçılarını Zəfər Günü münasibətilə təbrik edib. Bildirib ki,
44 günlük Vətən müharibəsində qələbəmizi bizə qazandıran Müzəffər
Ordumuzun əsgər və zabitləri qarşısında baş əyir, şəhidlərimizə
Allahdan rəhmət diləyirik. Ölkəmizin igid oğulları Ali Baş
Komandanın başçılığı ilə qəhrəmancasına döyüşdü, öz qanları
bahasına bu qələbəni bizə qazandırdı. Zəfərimizi təmin edən əsas
amillərdən biri xalqımızın cənab Prezident İlham Əliyev ətrafında
yumruq kimi birləşməsi oldu.
Tədbirdə 44 günlük Vətən müharibəsi qəhrəmanı, şəhid polkovnik-leytenant Anar Əliyevin həyat yoldaşı Vüsalə Əliyeva çıxış edib. O, Anar Əliyevin həyatı haqqında söhbət açıb, şəhidimizin təhsili, yüksək insani keyfiyyətləri və qazandığı nailiyyətləri diqqətə çatdırıb. V.Əliyeva tarixboyu apardığımız bütün mübarizələrin sonunda dövlətimizin suverenliyinin bərpası ilə şəhidlərimizin xatirəsinin əbədiləşdirildiyini diqqətə çatdırıb.
BİK-in direktoru Mehman İsmayılov Ali Baş Komandan möhtərəm cənab İlham Əliyevin rəhbərliyi ilə əldə olunmuş tarixi qələbədən, 44 günlük Vətən müharibəsində Azərbaycan Ordusunun mənəvi gücündən bəhs edib. M.İsmayılov gənclərin tərbiyə olunmasında milli-mənəvi dəyərlərin rolundan danışıb.
Daha sonra Aİİ-nin “İslamşünaslıq” ixtisası üzrə təhsil alan III kurs tələbəsi, 44 günlük Vətən müaharibəsi iştirakçısı, “Zəngilanın azad olunmasına görə” medalı ilə təltif olunan Turqut Alışov çıxış edib. O, Vətən müharibəsi iştirakçısı olaraq qürur hissi duyduğunu qeyd edib, həmin günlərlə bağlı xatirələrini bölüşüb.
