Bakı, AzerVoice

Yeni Zelandiya hökuməti dövlət məktəblərində halal qida təqdim etməməklə müsəlman tələbələri marjinallaşdırmaqda günahlandırılır.

AzerVoice xəbər verir ki, məsələ, məktəblərə yemək tədarük edən Compass şirkətinin bəzi yeməklərin halal sertifikatlı olmadığını etiraf etməsindən sonra gündəmə gəlib.

Compass şirkəti yeməklərdə halal sertifikatlı məhsullardan istifadə edildiyini, lakin yeməklərin hazırlandığı mətbəxlərin halal standartlarına uyğun olmadığını bildirib. Bu açıqlama müsəlman icmasında narazılığa səbəb olub.

ACT Yeni Zelandiya Partiyasının lideri və təhsil nazirinin müavini David Seymour, məktəblərdə halal sertifikatlı yeməklərin təqdim edilməsinin lazımsız xərc olacağını söyləyib. Onun bu açıqlaması müsəlman icmasının narazılığına səbəb olub.

Yeni Zelandiya İslam Dərnəkləri Federasiyasının (FIANZ) sözçüsü Abdur Razaaq isə halal qida tədarükünün çətin və bahalı olmadığını vurğulayaraq hökuməti tənqid edib.

Dövlət məktəblərində təhsil alan müsəlman tələbələr hökuməti icmanı təcrid etməkdə və onların qida seçimlərini nəzərə almamaqda ittiham edirlər. Onların fikrincə, bu vəziyyət dini və mədəni hüquqlara hörmətsizlikdir.

Məsələ ilə bağlı Yeni Zelandiya hökumətindən hələlik rəsmi açıqlama verilməyib.