BAKI,VOA Orxan Qədirzadə

İsrailin Baş prokuroru Gali Baharav-Miara Baş nazir Benyamin Netanyahu tərəfindən Roman Qofmanın Mossad rəhbəri vəzifəsinə təyin olunmasına etiraz edib.

VOA xəbər verir ki, İsrail dövlət televiziyası KAN-ın məlumatına görə, Baş prokuror məsələ ilə bağlı İsrail Ali Məhkəməsinə rəsmi etiraz ərizəsi təqdim edib. Baharav-Miara sənəddə Qofmanın təyinatında “əsaslı hüquqi və etik qüsurlar” olduğunu vurğulayıb.

Baş prokurorun iddiasına əsasən, Roman Qofmanın adı yetkinlik yaşına çatmayan israilli Uri Elmakiasın iştirak etdiyi qalmaqallı kəşfiyyat əməliyyatı ilə əlaqələndirilir. Bildirilir ki, Qofman 2022-ci ildə Colan təpələrində xidmət etdiyi dövrdə 17 yaşlı Elmakiası İran və Hizbullaha qarşı təsir əməliyyatında istifadə edib.

Məlumata görə, gəncə sosial şəbəkələrdə paylaşılması üçün gizli məlumatlar verilib. Daha sonra İsrailin daxili təhlükəsizlik xidməti Şin-Bet onun fəaliyyətini aşkar edərək casusluq şübhəsi ilə saxlayıb. İstintaq zamanı Elmakias onu əməliyyata cəlb edən şəxsin birbaşa Qofman olduğunu bildirib.

Baş prokuror hesab edir ki, bu hadisə Roman Qofmanın dürüstlüyünə və Mossad rəhbərliyinə uyğunluğuna ciddi kölgə salır. O, həmçinin təyinat prosedurunda qanun pozuntularının olduğunu qeyd edib və məhkəmənin məsələyə müdaxilə etməsinin qaçılmaz olduğunu bildirib.

İsrail hökuməti isə Baş prokurorun mövqeyinə sərt reaksiya verib. Koalisiya rəhbəri Ofir Kats sosial şəbəkədə paylaşım edərək etirazların siyasi motivli olduğunu iddia edib və təyinat prosesinin davam etdirilməli olduğunu bildirib.

Maliyyə naziri Bezalel Smotrich də Baş prokuroru hökumətə qarşı fəaliyyət göstərməkdə ittiham edib və ölkədə mübahisələrə səbəb olan məhkəmə islahatlarının davam etdiriləcəyini açıqlayıb.

Məlumata əsasən, Netanyahu tərəfindən Mossad rəhbərliyinə namizəd göstərilən Roman Qofmanın 2 iyun 2026-cı ildə vəzifəni hazırkı direktor David Barneadan təhvil alması planlaşdırılır.