BAKI,VOA Orxan Qədirzadə

Yəmənin Ədən şəhərində son günlər baş verən silsilə sui-qəsdlər ölkədəki təhlükəsizlik vəziyyətinin kövrəkliyini yenidən gündəmə gətirib. Bu barədə VOA Yəmənin rəsmi mənbələrinə və beynəlxalq hesabatlara istinadən xəbər verir.

Məlumata əsasən, şənbə günü Sosial İnkişaf Fondunun icraçı direktoru vəzifəsini icra edən Visam Qaid naməlum şəxslər tərəfindən qaçırılaraq qətlə yetirilib. Siyasi fəaliyyətlə məşğul olmayan mülki şəxsin hədəf alınması şəhərdəki dövlət təsisatlarına qarşı birbaşa təhdid kimi qiymətləndirilir. Bu hadisədən bir neçə gün öncə isə "İslah" partiyasının rəhbər şəxslərindən biri olan Əbdürrəhman əl-Şairə qarşı bənzər cinayət törədilib.

Daha sonra qeyd olunub ki, sui-qəsdlər hökumətin Ədən və ətraf bölgələrdə hərbi-təhlükəsizlik strukturunu yenidən qurmaq, daxili işlər və müdafiə nazirliklərinin nəzarətini gücləndirmək cəhdləri fonunda baş verir. Mütəxəssislərin fikrincə, bu cinayətlər dövlətin asayişi bərpa etmək səylərini sarsıtmaq və cəmiyyətdə qorxu mühiti yaratmaq məqsədi daşıyır. Artıq təhlükəsizlik qüvvələri tərəfindən genişmiqyaslı əməliyyatlara başlanılıb və sui-qəsd hazırlığında olan bir qruplaşma zərərsizləşdirilib.

Xatırladaq ki, 2015-ci ildən bəri Yəməndə 480-dən çox sui-qəsd faktı qeydə alınıb. Beynəlxalq birlik, o cümlədən ABŞ və Böyük Britaniyanın Yəməndəki səfirlikləri baş verən hadisələri pisləyərək, günahkarların məsuliyyətə cəlb olunması və bölgədə sabitliyin qorunması üçün ciddi addımların atılmasının vacibliyini vurğulayıblar.