BAKI,VOA, Orxan Qədirzadə

Qətər Enerji ABŞ-da həyata keçirdiyi böyük layihədən ilk mayeləşdirilmiş qaz ixracını reallaşdırıb.

VOA xəbər verir ki, şirkət Texas ştatında yerləşən “Qolden Pass” layihəsindən ilk mayeləşdirilmiş təbii qaz yükünün ixrac edildiyini açıqlayıb.

Məlumata görə, bu layihə Qətər Enerji və “ExxonMobil” şirkətinin birgə təşəbbüsüdür və ilk ixrac əməliyyatı layihənin tam kommersiya fəaliyyətinə keçidinin başlanğıcı kimi qiymətləndirilir.

Şirkət bildirib ki, qaz yükü müasir qazdaşıyıcı gəmi vasitəsilə təhlükəsiz şəkildə daşınaraq beynəlxalq bazara yönləndirilib.

Qətərin energetika naziri və Qətər Enerjinin rəhbəri Səəd bin Şəridə əl-Kaabi qeyd edib ki, bu addım qlobal enerji bazarında artan tələbatın qarşılanması baxımından mühüm mərhələdir.

Onun sözlərinə görə, layihə ABŞ-da mayeləşdirilmiş qaz sektorunda ən böyük investisiya qərarlarından biri olmaqla yanaşı, Qətərin etibarlı enerji təchizatçısı kimi mövqeyini daha da gücləndirir.

Ekspertlər bildirir ki, layihənin illik istehsal gücü 18 milyon ton təşkil edir və bu, qlobal LNG bazarında təklifin genişlənməsinə əhəmiyyətli təsir göstərəcək.

Analitiklərə görə, bu inkişaf həm ABŞ, həm də Qətər üçün strateji əhəmiyyət daşıyır və enerji tədarük zəncirlərinin şaxələndirilməsi prosesini sürətləndirir.