BAKI, VOA, Orxan Qədirzadə

Dünyanın ən məşhur mədəniyyət bayramlarından biri olan Müqəddəs Patrik Günü (St. Patrick’s Day) ilə bağlı aparılan tarixi araşdırmalar bu bayramın ilk paradının İrlandiyada deyil, Amerikadakı İspan müstəmləkəsində keçirildiyini sübut edir.

Tarixi qeydlər ilk Müqəddəs Patrik paradının 17 mart 1601-ci ildə hazırda Floridanın Sent-Avqustin (St. Augustine) şəhəri kimi tanınan yaşayış məntəqəsində keçirildiyini göstərir.

Bu tədbir həmin vaxt koloniyanın irlandiyalı vikarı Rikardo Arturun rəhbərliyi altında baş tutub. Bundan bir əsrdən çox vaxt keçdikdən sonra, 1737-ci ildə Bostonda və 1762-ci ildə Nyu-Yorkda Britaniya ordusunda xidmət edən irlandiyalı əsgərlər öz mədəni kimliklərini qorumaq üçün yürüşlər keçiriblər. IV əsrin sonlarında Britaniyada doğulan və sonradan İrlandiyanın xristianlaşdırılmasında mühüm rol oynayan Müqəddəs Patrik, bu gün milyonlarla irlandiyalı tərəfindən milli kimliyin simvolu kimi qəbul edilir.

XIX əsrin ortalarında ABŞ-a irlandiyalı immiqrant axınının kəskin artması ilə bu bayram ümummilli miqyas alıb. Hazırda ABŞ-ın bir çox şəhərlərində milyonlarla insan Müqəddəs Patrik paradlarında iştirak edərək öz əcdadlarının tarixini və mədəniyyətini qeyd edirlər. Bayram xüsusilə yaşıl rəng və coşqun şənliklərlə xarakterizə olunur.