Mədəni İrsin Qorunması, İnkişafı və Bərpası üzrə Dövlət Xidməti beynəlxalq mükafat qazanıb. Qurum mədəni irsin rəqəmsallaşdırılması və məlumatlara əsaslanan mühafizə sahəsində əldə etdiyi nəticələrə görə fərqləndirilib. Mükafat Birləşmiş Ərəb Əmirliklərində keçirilən beynəlxalq müsabiqə çərçivəsində təqdim olunub. Qiymətləndirmə zamanı tarixi abidələrin rəqəmsal qeydiyyatı, vahid məlumat bazalarının yaradılması və yenilikçi idarəetmə üsullarının tətbiqi nəzərə alınıb. Dövlət Xidmətinin altı istiqamət üzrə təqdim etdiyi elektron xidmətlər də yüksək qiymətləndirilib. Vətəndaşların müraciətlərini rəqəmsal qaydada izləyə bilməsi şəffaflığı və xidmət keyfiyyətini artıran amil kimi göstərilib. Mükafat qurumun rəqəmsal inkişaf sahəsində gördüyü işlərin beynəlxalq səviyyədə tanındığını təsdiqləyir. Bu, Dövlət Xidmətinin cari ildə qazandığı növbəti beynəlxalq uğurdur.