İran İslam İnqilabı Keşikçiləri Korpusunun Hərbi Dəniz Qüvvələrinin komandanı Hörmüz boğazının sutka ərzində daimi nəzarətdə saxlanıldığını bildirib. Komandan hazırda keçirilən “Fars körfəzi adalarından müdafiə gücü və hücum əməliyyatları” adlı manevrlərə toxunaraq bildirib ki, təlimlər yeni taktika və avadanlıqların tətbiqi ilə həyata keçirilir. Onun sözlərinə görə, bu məşqlər strateji regionun təhlükəsizliyinə hazırlıq məqsədi daşıyan illik proqramın tərkib hissəsidir və adaların müdafiəsi ilə strateji su yolunun təhlükəsizliyi SEPAH Hərbi Dəniz Qüvvələrinin məsuliyyətinə daxildir.

İran İslam İnqilabı Keşikçiləri Korpusu Hərbi Dəniz Qüvvələri Hörmüz boğazında “Boğazın Ağıllı Nəzarəti” adlı hibrid və canlı hərbi təlim həyata keçirib. Məlumata əsasən, manevrlərin əsas məqsədləri SEPAH Hərbi Dəniz Qüvvələrinin bölmələrinin əməliyyat hazırlıq səviyyəsinin yoxlanılması, logistika planlarının nəzərdən keçirilməsi və Hörmüz boğazı bölgəsində mümkün təhlükəsizlik və hərbi təhdidlərə qarşı qarşılıqlı cavab ssenarilərinin məşq edilməsindən ibarət olub.