Bakı. AzerVoice:
2024-cü ildə Azərbaycanda Prezident seçkiləri demokratik və ədalətli şəraitdə keçirilib.
AzerVoice-in məlumatına görə, bu barədə jurnalistlərə ASEAN Parlamentlərarası Assambleyasının (AIPA) komitəsinin sədri Saniya Praseut bildirib.
“2024-cü ildə Azərbaycanda keçirilən Prezident seçkiləri uğurlu, azad, ədalətli olub və aktiv seçki hüququna malik 18 yaşına çatmış Azərbaycan vətəndaşlarına öz vətəndaşlıq və siyasi hüquqlarından istifadə etmək imkanı verib”.
O, həmçinin, qeyd edib ki, seçki məntəqələri yaxşı təşkil olunub, seçicilərə öz seçimlərini sərbəst və tam şəkildə bildirmək imkanı yaradılıb. Siyasi partiyalardan olan müşahidəçilərə, yerli və beynəlxalq müşahidəçilərə bütün seçki prosesini yaxından izləmək imkanı verən şəffaf sistem mövcud idi.
"Seçkilər rahat və dinc şəraitdə keçib. Məntəqə bağlandıqdan sonra nümayəndə heyətinin nümayəndəsi müxtəlif seçki məntəqələrində səslərin sayılması və nəticələrin hesablanması prosesini müşahidə etməkdə iştirak edib, seçkilər açıq və şəffaf şəkildə keçirilib. Səsvermə prosesi Azərbaycan Respublikasının Seçki Məcəlləsinə uyğun təşkil olunub və texniki cəhətdən səmərəli olub”.
Xatırladaq ki, ötən gün Azərbaycanda Prezident seçkiləri keçirilib. Prezident seçkilərində 7 nəfərin namizədliyi qeydə alınıb. Onlardan 5 nəfərin namizədliyi siyasi partiyalar tərəfindən, 2 nəfərin namizədliyi öz təşəbbüsü ilə irəli sürülüb.
Seçki məntəqələrinin 93,35 faizindən daxil olan məlumatlar əsasında prezident seçkilərinin ilkin nəticələrinə əsasən Yeni Azərbaycan Partiyasının prezidentliyə namizədi İlham Əliyev 92,05 faiz səslə liderdir.
Namizədliyi özü tərəfindən irəli sürülən Zahid Oruc səslərin 2,19 %, Milli Cəbhə Partiyasının prezidentliyə namizədi Razi Nurullayev 0,8% , Böyük Quruluş Partiyasının prezidentliyə namizədi Fazil Mustafa 2 % Böyük Azərbaycan Partiyasının prezidentliyə namizədi Elşad Musayev 0,67%, Bütöv Azərbaycan Xalq Cəbhəsi Partiyasının prezidentliyə namizədi Qüdrət Həsənquliyev 1,76% və namizədliyi özü tərəfindən irəli sürülən Fuad Əliyev isə səslərin 0,53 % toplayıb.
