BAKI,VOA

1985-ci il mayın 11-də İngiltərənin Bredford şəhərində yerləşən futbol stadionunda baş verən dəhşətli yanğın nəticəsində 56 nəfər həyatını itirib, yüzlərlə insan yaralanıb.

Hadisə Bredford və Linkoln Siti komandaları arasında keçirilən futbol oyunu zamanı baş verib. Həmin gün minlərlə azarkeş klubun iki il ərzində müflis vəziyyətdən yüksələrək çempionluq qazanmasını və ikinci liqaya vəsiqə əldə etməsini qeyd etmək üçün stadiona toplaşmışdı.

Oyunun ilk hissəsinin sonlarına yaxın əsas tribunaların bir tərəfində yanğın başlayıb. Başlanğıcda bir çox insan vəziyyətin təhlükəli olduğunu anlamayıb və yalnız alovdan uzaqlaşmaq üçün meydançaya enməyə çalışıb.

Lakin alov qısa müddətdə taxta konstruksiyalı dam örtüyünə keçərək sürətlə bütün tribunaya yayılıb. Cəmi dörd dəqiqə ərzində stadionun taxta damı tamamilə yanaraq dağılıb.

Hadisədən sağ çıxan Cefri Mitçell sonradan verdiyi açıqlamada bildirib ki, alov ildırım sürəti ilə yayılıb:

“Yanğın bir anda hər tərəfi bürüdü. Belə bir şey heç vaxt görməmişdim. Tüstü nəfəs almağa imkan vermirdi”.

Faciə zamanı stadionda böyük panika yaşansa da, bəzi tamaşaçılar hadisənin miqyasını dərhal dərk edə bilməyib. Məlumatlara görə, bəzi gənclər alovun qarşısında mahnı oxuyur, digərləri isə televiziya çəkiliş qrupuna daş atırdı.

Hadisə ilə bağlı aparılan rəsmi araşdırma nəticəsində tribunaların altında yığılan tullantıların yanğının əsas səbəbi olduğu müəyyən edilib. Ehtimal olunur ki, atılmış siqaret kötüyü alovu alışdırıb. Köhnə və istifadəyə yararsız vəziyyətdə olan taxta konstruksiya isə yanğının sürətlə yayılmasına səbəb olub.

Maraqlıdır ki, faciənin baş verdiyi həftə stadionun köhnə taxta dam örtüyünün sökülərək metal konstruksiya ilə əvəzlənməsi planlaşdırılırdı.

Bredford stadion faciəsi İngiltərə futbol tarixinin ən ağır hadisələrindən biri kimi yadda qalıb və sonrakı illərdə stadion təhlükəsizliyi qaydalarının ciddi şəkildə dəyişdirilməsinə səb