Bakı. AzerPress:

Dünən Bakı şəhərində Azərbaycan və Rusiya xarici işlər nazirlikləri arasında regional və Avropa təhlükəsizliyi mövzusunda məsləhətləşmələrin növbəti raundu keçirilib.

AzerPress xəbər verir ki, bu barədə Xarici İşlər Nazirliyi məlumat yayıb.

Bildirilib ki, məsləhətləşmələr Azərbaycan xarici işlər nazirinin müavini Araz Əzimov və Rusiya xarici işlər nazirinin müavini Aleksandr Qruşko arasında aparılıb.

Tərəflər regional və beynəlxalq təhlükəsizlik məsələləri ətrafında fikir mübadiləsi aparıb, hər iki ölkənin birgə iştirak etdiyi regional əməkdaşlıq formatları çərçivəsində əməkdaşlıq məsələlərini, habelə, Avropa regional təşkilatlarının gündəliyində duran qarşılıqlı maraq kəsb edən mövzuları müzakirə ediblər.

xxx

16:26

Azərbaycan və Rusiya xarici işlər nazirlərinin müavinləri Araz Əzimov və Aleksandr Qruşko Bakıda siyasi məsləhətləşmələr keçirib.

AzerPress xəbər verir ki, bu barədə Rusiya Xarici İşlər Nazirliyi məlumat yayıb.

Bildirilib ki, regional və Avropa təhlükəsizlik məsələləri üzrə məsləhətləşmələrdə Avropada Təhlükəsizlik və Əməkdaşlıq Təşkilatında (ATƏT) qarşılıqlı əlaqələr, Avropa Şurasındakı vəziyyət və iki ölkənin Avropa İttifaqı (Aİ) və NATO ilə münasibətləri, o cümlədən, ikitərəfli və beynəlxalq gündəmdə duran aktual məsələlər müzakirə olunub.

Məlumatda, həmçinin, Aleksandr Qruşkonun Azərbaycan Respublikası Prezidentinin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyev tərəfindən qəbul olunduğu bildirilir.

"Azərbaycan Respublikası Prezidentinin xüsusi tapşırıqlar üzrə nümayəndəsi Elçin Əmirbəyovla görüş keçirilib", - məlumatda deyilir.

Bundan başqa, görüşlərdə region dövlətlərinin Cənubi Qafqazda sabitliyin dəstəklənməsində aparıcı rolunun və xüsusi məsuliyyətinin vurğulandığı qeyd olunub.